काठमाडौं, साउन ४ — राष्ट्रिय स्वतन्त्र पार्टी (रास्वपा) का सांसद अमरेशकुमार सिंहले मधेश प्रदेशमा कुनै पनि घटना वा विवाद उत्पन्न हुनासाथ सुरक्षाकर्मीले गोली चलाउने प्रवृत्तिप्रति गम्भीर प्रश्न उठाएका छन्। प्रतिनिधिसभाको बैठकमा बोल्दै उनले मधेशमा शान्ति सुरक्षा कायम गर्ने नाममा अत्यधिक बल प्रयोग भइरहेको आरोप लगाए।

सांसद सिंहले देशका अन्य क्षेत्रमा यस्तै प्रकृतिका घटना हुँदा वार्ता, सम्झाइबुझाइ र वैकल्पिक उपाय अपनाइने तर मधेशमा भने तत्काल गोली चलाउने प्रवृत्ति देखिनु चिन्ताजनक रहेको बताए। उनले यस्तो व्यवहारले मधेशका नागरिकमाथि राज्यको विभेदपूर्ण दृष्टिकोण झल्किने दाबी गरे।

उनले सरकारसँग प्रश्न गर्दै भने, “मधेशमा कुनै घटना हुनासाथ किन गोली चलाइन्छ ? किन वार्ता र संयमको विकल्प रोजिँदैन ?” उनका अनुसार बल प्रयोगलाई पहिलो विकल्प बनाउनु लोकतान्त्रिक शासन व्यवस्थाको भावना विपरीत हो।

सिंहले विगतका विभिन्न आन्दोलन तथा प्रदर्शनका क्रममा भएका गोलीकाण्डहरूको निष्पक्ष छानबिन गर्न पनि सरकारसँग माग गरे। दोषी जोसुकै भए पनि कानुनी दायरामा ल्याउनुपर्ने र भविष्यमा यस्ता घटना दोहोरिन नदिन स्पष्ट कार्यनीति बनाउनुपर्ने उनको भनाइ थियो।

उनले मधेशका नागरिकमा राज्यप्रतिको विश्वास बलियो बनाउन समान व्यवहार, संवेदनशील सुरक्षा नीति र मानवअधिकारको पूर्ण सम्मान आवश्यक रहेको बताए। प्रदर्शन वा तनावपूर्ण अवस्थाको व्यवस्थापनमा गोलीभन्दा संवाद, संयम र कानुनी प्रक्रियालाई प्राथमिकता दिनुपर्नेमा उनले जोड दिए।

सिंहको भनाइपछि सदनमा केही समय मधेशको सुरक्षा अवस्था, बल प्रयोगको नीति तथा नागरिक अधिकारको विषयमा छलफल भएको थियो। उनले सरकारलाई सुरक्षा निकायको कार्यशैली पुनरावलोकन गरी बल प्रयोगसम्बन्धी मापदण्ड कडाइका साथ लागू गर्न आग्रह गरे।