काठमाडौं ।
अविरल वर्षाका कारण कीर्तिपुर स्थित सुकुम्बासीहरूको होल्डिङ सेन्टर डुबानमा परेको छ । डुबानका कारण त्यहाँ आश्रय लिइरहेका नागरिकहरू जोखिममा परेपछि नेपाल प्रहरीले उद्धार कार्य सञ्चालन गरेको हो ।
प्रहरीका अनुसार होल्डिङ सेन्टरमा रहेका कुल १५४ जनामध्ये हालसम्म ५४ जनाको सकुशल उद्धार गरिएको छ । उद्धार गरिएकाहरूलाई तत्कालका लागि त्रिभुवन विश्वविद्यालय परिसरमा रहेको स्मृति भवन मा सुरक्षित रूपमा स्थानान्तरण गरिएको प्रहरीले जनाएको छ ।
डुबानका कारण होल्डिङ सेन्टरका आवासीय संरचना, दैनिक उपभोगका सामग्री तथा खाद्यान्नमा समेत क्षति पुगेको प्रारम्भिक जानकारी प्राप्त भएको छ । उद्धार कार्यमा नेपाल प्रहरी, स्थानीय प्रशासन तथा सम्बन्धित निकायका सुरक्षाकर्मी परिचालन भएका छन् ।
होल्डिङ सेन्टरमा अझै रहेका अन्य व्यक्तिहरूको अवस्था निगरानीमा राखिएको प्रहरीले जनाएको छ । आवश्यक परे थप उद्धार तथा सुरक्षित स्थानमा स्थानान्तरणको तयारी गरिएको छ । प्रभावित नागरिकहरूलाई खानेपानी, खाद्यान्न, स्वास्थ्य सेवा तथा अन्य अत्यावश्यक राहत सामग्री उपलब्ध गराउने पहल पनि भइरहेको छ ।
यसैबीच, लगातारको वर्षाका कारण काठमाडौं उपत्यकाका विभिन्न स्थानमा जलमग्न हुने, सडक अवरुद्ध हुने तथा नदी–खोलाको सतह बढ्ने क्रम जारी रहेकाले उच्च सतर्कता अपनाउन जिल्ला प्रशासन कार्यालय र सुरक्षा निकायहरूले सर्वसाधारणलाई आग्रह गरेका छन् । जोखिमयुक्त क्षेत्रका बासिन्दालाई सुरक्षित स्थानमा बस्न तथा आधिकारिक सूचनाको पालना गर्न अनुरोध गरिएको छ ।
प्रहरीले उद्धार कार्यलाई निरन्तरता दिँदै प्रभावित नागरिकहरूको सुरक्षा र आवश्यक सहयोगका लागि सम्बन्धित सबै निकायसँग समन्वय भइरहेको जनाएको छ ।