महेन्द्रनगर,धनुषा
क्षीरेश्वरनाथ नगरपालिका स्तरीय आधारभूत शिक्षा उत्तीर्ण परीक्षा २०८२ चैत्र ८ गतेदेखि औपचारिक रूपमा सुरु भएको छ । यस वर्षको परीक्षा विशेष रूपमा पहिलोपटक विद्यालयको आन्तरिक (गृह) केन्द्रभन्दा बाहिर तोकिएका परीक्षा केन्द्रहरूमा सञ्चालन गरिएको छ, जसले परीक्षा प्रणालीलाई अझ व्यवस्थित, निष्पक्ष र पारदर्शी बनाउने अपेक्षा गरिएको छ ।
नगरपालिकाले यसपटक तीन वटा परीक्षा केन्द्र निर्धारण गरेको छ । ती केन्द्रहरूमा श्री माध्यमिक विद्यालय कुम्हरौल रमदैया भवाडी, क्षिरेश्वर जनता माध्यमिक विद्यालय महेन्द्रनगर र दर्शनीय रामेश्वर सिंह कुशवाहा एकेडेमी महेन्द्रनगर रहेका छन् । यी केन्द्रहरूमा व्यवस्थित रूपमा परीक्षार्थीहरूलाई राखेर शान्तिपूर्ण वातावरणमा परीक्षा सञ्चालन भइरहेको जनाइएको छ ।
परीक्षामा नगरभित्रका सामुदायिक, संस्थागत तथा शैक्षिक गुठी अन्तर्गतका विद्यालयहरूबाट विद्यार्थीहरूको उल्लेखनीय सहभागिता देखिएको छ । प्राप्त जानकारी अनुसार सामुदायिक विद्यालयतर्फ ७ वटा, संस्थागत विद्यालयतर्फ १२ वटा र शैक्षिक गुठी अन्तर्गत १ वटा गरी जम्मा २० वटा विद्यालयका ८७१ जना विद्यार्थीहरू परीक्षामा सहभागी भएका छन् ।
नगरपालिकाका शिक्षा शाखाका अनुसार परीक्षा मर्यादित, अनुशासित र निष्पक्ष बनाउन आवश्यक सबै तयारी पूरा गरिएको छ । प्रत्येक केन्द्रमा निरीक्षक, सहायक कर्मचारी तथा सुरक्षाकर्मीहरूको उचित व्यवस्थापन गरिएको छ भने परीक्षा सञ्चालनमा कुनै अवरोध नआओस् भन्ने उद्देश्यले विशेष ध्यान दिइएको छ ।
स्थानीय शिक्षा सरोकारवालाहरूले बाहिरी परीक्षा केन्द्रको व्यवस्था सकारात्मक कदम भएको बताएका छन् । यसले विद्यार्थीहरूमा प्रतिस्पर्धात्मक भावना बढाउने, नकल नियन्त्रण गर्ने तथा समग्र शैक्षिक गुणस्तर सुधारमा टेवा पुग्ने विश्वास लिइएको छ ।
परीक्षा निर्धारित तालिका अनुसार आगामी दिनहरूमा निरन्तर सञ्चालन हुने नगरपालिकाले जनाएको छ ।