महेन्द्रनगर,
पछिल्लो केही सातादेखि बढ्दो गर्मीका कारण मधेश प्रदेशसहित तराईका जिल्लामा जनजीवन कष्टकर बन्दै गएको छ । धनुषा, महोत्तरी, सर्लाही, रौतहटलगायत जिल्लाहरूमा दैनिक तापक्रम ४० डिग्री सेल्सियसभन्दा माथि पुगेको छ, जसले सर्वसाधारणको दैनिकीलाई नराम्ररी प्रभावित बनाएको छ ।
गर्मीको चर्को प्रकोपका कारण बिहान १० बजेदेखि दिउँसो ४ बजेसम्म सडक र बजार क्षेत्रहरू सुनसान देखिन्छन्। अत्यावश्यक कामबाहेक मानिसहरू घर बाहिर ननिस्कने गरेका छन् । “बिहानैदेखि घाम चर्को लाग्ने र बेलुका अबेरसम्म पनि गर्मी नहट्ने भएकोले काम गर्नै सकिंदैन,” धनुषाको महेन्द्रनगरका रिक्सा चालक राम बरण साह भन्छन् ।
विद्यालयहरूमा पनि यसको प्रत्यक्ष असर देखिन थालेको छ । कतिपय स्थानीय तहले विद्यालय समय घटाएका छन् भने केहीले अस्थायी रूपमा बिदा दिएका छन् ।
स्वास्थ्य संस्था अनुसार अत्यधिक गर्मीका कारण डिहाइड्रेसन, लु (तातो हावा लाग्ने), टाउको दुख्ने, चक्कर लाग्ने, र झाडापखाला जस्ता समस्या लिएर आउने बिरामीको संख्या दैनिक बढ्दो छ । जनस्वास्थ्य कार्यालयले जोखिममा रहेका बालबालिका, वृद्धवृद्धा र रोग प्रतिरोधात्मक क्षमता कम भएका व्यक्तिहरूलाई विशेष सतर्कता अपनाउन आग्रह गरेको छ ।
गर्मीको प्रभावबाट बच्न दीर्घकालीन समाधानका लागि वृक्षारोपण, जलस्रोतको संरक्षण र वातावरणमैत्री विकास रणनीति आवश्यक भएको विज्ञहरूको भनाइ छ ।